மார்ச் 1 : நற்செய்தி வாசகம்

0

இவன்தான் சொத்துக்கு உரியவன்; வாருங்கள், நாம் இவனைக் கொன்றுபோடுவோம்.

இவன்தான் சொத்துக்கு உரியவன்; வாருங்கள், நாம் இவனைக் கொன்றுபோடுவோம்.

✠ மத்தேயு எழுதிய தூய நற்செய்தியிலிருந்து வாசகம் 21: 33-43, 45-46

அக்காலத்தில்

இயேசு தலைமைக் குருக்களையும் மக்களின் மூப்பர்களையும் நோக்கிக் கூறியது: “மேலும் ஓர் உவமையைக் கேளுங்கள்; நிலக்கிழார் ஒருவர் ஒரு திராட்சைத் தோட்டம் போட்டு, சுற்றிலும் வேலி அடைத்து அதில் பிழிவுக் குழி வெட்டி ஒரு காவல் மாடமும் கட்டினார்; பின்பு தோட்டத் தொழிலாளர்களிடம் அதைக் குத்தகைக்கு விட்டுவிட்டு நெடும் பயணம் மேற்கொண்டார்.

பழம் பறிக்கும் காலம் நெருங்கி வந்தபோது அவர் தமக்குச் சேர வேண்டிய பழங்களைப் பெற்று வரும்படி தம் பணியாளர்களை அத்தோட்டத் தொழிலாளர்களிடம் அனுப்பினார். தோட்டத் தொழிலாளர்களோ அவருடைய பணியாளர்களைப் பிடித்து, ஒருவரை நையப் புடைத்தார்கள்; ஒருவரைக் கொலை செய்தார்கள்; ஒருவரைக் கல்லால் எறிந்தார்கள். மீண்டும் அவர் முதலில் அனுப்பியவர்களைவிட மிகுதியான வேறு சில பணியாளர்களை அனுப்பினார். அவர்களுக்கும் அப்படியே அவர்கள் செய்தார்கள். தம் மகனை மதிப்பார்கள் என்று அவர் நினைத்துக்கொண்டு அவரை இறுதியாக அவர்களிடம் அனுப்பினார்.

அம்மகனைக் கண்டபோது தோட்டத் தொழிலாளர்கள், ‘இவன்தான் சொத்துக்கு உரியவன்; வாருங்கள், நாம் இவனைக் கொன்றுபோடுவோம்; அப்போது இவன் சொத்து நமக்குக் கிடைக்கும்’ என்று தங்களிடையே பேசிக்கொண்டார்கள். பின்பு அவர்கள் அவரைப் பிடித்து, திராட்சைத் தோட்டத்திற்கு வெளியே தள்ளிக் கொன்றுபோட்டார்கள். எனவே, திராட்சைத் தோட்ட உரிமையாளர் வரும்போது அத்தொழிலாளர்களை என்ன செய்வார்?” என இயேசு கேட்டார்.

அவர்கள் அவரிடம், “அத்தீயோரை ஈவிரக்கமின்றி ஒழித்து விடுவார்; உரிய காலத்தில் தமக்குச் சேர வேண்டிய பங்கைக் கொடுக்க முன்வரும் வேறு தோட்டத் தொழிலாளர்களுக்கு அத்திராட்சைத் தோட்டத்தைக் குத்தகைக்கு விடுவார்” என்றார்கள். இயேசு அவர்களிடம், “ ‘கட்டுவோர் புறக்கணித்த கல்லே கட்டடத்துக்கு மூலைக்கல் ஆயிற்று. ஆண்டவரால் இது நிகழ்ந்துள்ளது; நம் கண்களுக்கு இது வியப்பாயிற்று!’ என்று நீங்கள் மறைநூலில் ஒருபோதும் வாசித்தது இல்லையா? எனவே உங்களிடமிருந்து இறையாட்சி அகற்றப்படும்; அவ்வாட்சிக்கு ஏற்ற முறையில் செயல்படும் ஒரு மக்களினத்தார் அதற்கு உட்படுவர் என நான் உங்களுக்குச் சொல்கிறேன்.”

தலைமைக் குருக்களும் பரிசேயரும் அவருடைய உவமைகளைக் கேட்ட போது, தங்களைக் குறித்தே அவர் கூறினார் என்று உணர்ந்துகொண்டனர். அவர்கள் அவரைப் பிடிக்க வழிதேடியும் மக்கள் கூட்டத்தினர் அவரை இறைவாக்கினர் என்று கருதியதால் அவர்களுக்கு அஞ்சினார்கள்.

ஆண்டவரின் அருள்வாக்கு.

—————————————————————————

புறக்கணிக்கப்பட்ட கல் மூலைக்கல் ஆயிற்று!

தவக் காலத்தின் இரண்டாம் வாரம் வெள்ளிக்கிழமை

I தொடக்க நூல் 37: 3-4, 12-13a, 17b-28

திருப்பாடல் 105: 16-17, 18-19, 20-21

II மத்தேயு 21: 33-43, 45-46

புறக்கணிக்கப்பட்ட கல் மூலைக்கல் ஆயிற்று!

நம்பிக்கையில் நிலைத்து நில்!

ஒருவருடைய வளர்ச்சியைக் கண்டு அவரைத் தட்டிக்கொடுப்பதற்குப் பதில், அவரை மட்டம் தட்டுகின்ற நிலையைத்தான் பெரும்பாலும் காண முடிகின்றது. காரணம், நம்மைவிட அவர் பெரிய அளவில் வளர்ந்துவிடுவார் என்ற எண்ணம்தான்.

யாக்கோபு என்ற இஸ்ரயேல் தன்னுடைய பன்னிரண்டு புதல்வர்களில் யோசேப்பை மிகுதியாக அன்பு செய்தார். காரணம் தன்னுடைய முதிர்ந்த வயதில் அவர் பிறந்ததால்! தன்னுடைய அன்பின் வெளிப்பாடாக யாக்கோபு யோசேப்பிற்கு அழகு வேலைப்பாடு நிறைந்த ஓர் அங்கியைக் கொடுக்கின்றார். இந்த அங்கியானது தலைச்சன் பிள்ளைக்கு வழங்கப்படும் உரிமைக்கு இணையானது. அதைவிடவும் தன்னுடைய பன்னிரு புதல்வரில் அவர்தான் மற்றவர்களை வழி நடத்தப்போகிறார் என்பதன் அடையாளமாக அவர் அதனைக் கொடுக்கின்றார்.

இது யோசேப்பின்மீது மற்றவர்களுக்குப் பொறாமையை வரவழைக்கின்றது. இதனால் அவரை மற்றவர்கள் தங்களைப் பார்க்க வருகின்றபோது, பிடித்து மிதியானியரிடம் விலைக்கு விற்றுவிடுகின்றார்கள். இதைப் பற்றி இன்றைய முதல் வாசகத்தில் வாசிக்கின்றோம்.

இன்று நாம் பதிலுரைப்பாடலாகக் பாடக்கேட்ட திருப்பாடல் 105 இல், தம் சொந்தச் சகோதரர்களால் புறக்கணிக்கப்பட்ட யோசேப்பு, எகிப்தில் மன்னருக்கு அடுத்த நிலைக்கு உயர்வதைப் பற்றி வாசிக்கின்றோம். நற்செய்தியிலும் இதையொத்த நிகழ்வு நடைபெறுகின்றது. இயேசு சொல்லும் கொடிய குத்தகைக்காரர் உவமையில் அவர் யூதத் தலைவர்களால் புறக்கணிக்கப்பட்டாலும், கடவுள் அவரை மூலைக் கல்லாக உயர்த்துகின்றார் (1 பேது 2:9)

ஆகையால், நாம் கடவுளுக்கு உகந்த வாழ்க்கை வாழும் போது, மக்களால் புறக்கணிக்கப்படுகின்றோம் என நினைக்காமல், கடவுள்மீது நம்பிக்கை வைத்து அவரது பணியைச் செய்வோம். கடவுள் நம்மை தவிர்க்க முடியாத ஓர் ஆளுமையாக நம்மை உயர்த்துவார்.

Leave A Reply

Your email address will not be published.