உண்மையான நீதி என்பது சட்ட நுணுக்கங்களுக்கு அப்பாற்பட்டது
நிறுவனங்களின் நம்பகத்தன்மை மற்றும் சமூக ஒன்றிப்பு ஆகிய இரண்டையும் மேம்படுத்துவதில் நீதியின் முக்கியப் பங்கை வலியுறுத்தினார் திருத்தந்தை பதினான்காம் லியோ.
மார்ச் 14, சனிக்கிழமையன்று, வத்திக்கான் நீதிமன்றத்தின் ஆண்டுத் தொடக்க விழாவை முன்னிட்டு அதன் உறுப்பினர்களைத் திருப்பீடத்தில் சந்தித்தபோது இவ்வாறு கூறினார் திருத்தந்தை.
இந்தச் சந்திப்பின்போது இடம்பெற்ற தனது முதல் உரையில், நீதிபதிகள் மற்றும் சட்டப் பணியாளர்களின் ஆரவாரமற்ற அதேவேளை, அவசியமான சேவையைப் பாராட்டிய திருத்தந்தை, “உண்மையான நீதி என்பது சட்ட நுணுக்கங்களுக்கு அப்பாற்பட்டது” என்றும் குறிப்பிட்டுள்ளார்.
புனித அகுஸ்தினார் மற்றும் புனித தாமஸ் அக்குவினாஸ் போன்ற கிறிஸ்தவச் சிந்தனையாளர்களை மேற்கோள்காட்டிய திருத்தந்தை, “நீதி என்பது வெறும் சட்டத்தின் கொள்கை மட்டுமல்ல” என்றும், “அது சமூக ஒன்றிப்பை உருவாக்கி, சமுதாயத்தை வலுப்படுத்தும் ஒரு நற்பண்பு” என்றும் எடுத்துக்காட்டினார்.
மேலும் நீதிக்கும் அன்புக்கும் இடையிலான தொடர்பை வலியுறுத்திய திருத்தந்தை, “உண்மையான நீதி என்பது மனித மாண்பை மதிப்பதாகவும், நல்லிணக்கத்தை வளர்ப்பதாகவும் இருக்க வேண்டும்” என்றும், “அதே வேளையில் அது திருஅவையின் ஒன்றிப்புக்கும் பங்களிக்க வேண்டும்” என்றும் மொழிந்தார்.
“திருப்பீடத்தில் மேற்கொள்ளப்படும் நீதித்துறைப் பணிகள் வெறும் சட்ட ஒழுங்கை மட்டும் பாதுகாப்பதில்லை, மாறாக, அது நிறுவனங்களின் நம்பகத்தன்மையையும், அனைத்துலக அளவில் திருப்பீடத்தின் பணிகளையும் பாதுகாக்கிறது” என்று சுட்டிக்காட்டினார் திருத்தந்தை.
“ஒவ்வொரு முடிவும் தீர்ப்பும் பிறரன்புடன் கூடிய உண்மையை நோக்கிய தேடலைப் பிரதிபலிக்க வேண்டும்” என்றும், “நீதி என்பது நேர்மையுடன் செயல்படுத்தப்படும்போது, அது நிலைத்தன்மைக்கும் நம்பிக்கைக்கும் ஆதாரமாக மாறுகிறது” என்றும் எடுத்துக்காட்டிய திருத்தந்தை, “அதிகாரிகள் தங்கள் பணியை விவேகத்துடனும், விசுவாச உணர்வுடனும் தொடர்ந்து செய்ய வேண்டும்” என்று அவர்களைக் கேட்டுக் கொண்டார்.