உணவு பெறுவது ஒவ்வொரு மனிதரின் அடிப்படை உரிமை என்றும், உணவைப் போரில் ஆயுதமாகவோ, அரசியல் ஆதிக்கத்திற்கான கருவியாகவோ ஒருபோதும் பயன்படுத்தக் கூடாது என்றும் திருத்தந்தை பதினான்காம் லியோ அவர்கள் தெரிவித்துள்ளார்.
அக்டோபர் 16ஆம் நாள் கடைப்பிடிக்கப்பட்ட உலக உணவு நாளை முன்னிட்டு, ஐக்கிய நாடுகள் அவையின் உணவு மற்றும் வேளாண்மை அமைப்புக்கு (FAO) அனுப்பிய செய்தியில் இவ்வாறு குறிப்பிட்டுள்ள திருத்தந்தை, பாதுகாப்பான, போதுமான உணவு அனைவருக்கும் கிடைப்பதை உறுதிசெய்வது நாடுகளுக்கும் அனைத்துலக சமூகத்திற்கும் உள்ள கடமை என்று குறிப்பிட்டுள்ளார்.
இவ்வாண்டின் உலக உணவு நாளுக்கான, “இன்று புதுமைகளைப் புகுத்துவோம்; நாளைய உணவை உறுதிசெய்வோம்” என்ற மையக்கருத்தைச் சுட்டிக்காட்டிய திருத்தந்தை, பசியைப் போக்குவதற்காக அந்த அமைப்பு மேற்கொண்டு வரும் முயற்சிகளையும் பாராட்டியுள்ளார்.
மேலும், தொழில்நுட்பம் பெரும் முன்னேற்றம் அடைந்துள்ள இக்காலத்திலும், உணவு ஒரு சலுகையாகவும், தண்ணீர் போட்டிக்குரிய பொருளாகவும் கருதப்படுவது ஏற்றுக்கொள்ள முடியாதது என்று குறிப்பிட்டுள்ள திருத்தந்தை, பசி என்பது அரசியல் உறுதியின்மை மற்றும் கூட்டுப் பரிவின்மையால் ஏற்படுவதாகவும், உணவு உற்பத்தியில் முன்னேற்றம் ஏற்பட்டாலும், அதன் சமமான பகிர்வு புறக்கணிக்கப்படுவதாகவும் தெரிவித்துள்ளார்.
