அமைதி “சுதந்திரம் மற்றும் உண்மைக்கான இடங்களை உருவாக்குகிறது” : திருத்தந்தை

தியான வாழ்வுக்கான அழைப்பு, திருஅவையின் மறைப்பணியிலிருந்து விலகிய ஒன்றல்ல; மாறாக, அது திருஅவையின் பணியின் “துடிக்கும் இதயம்” என்று திருத்தந்தை பதினான்காம் லியோ அவர்கள் கூறினார்.

செப்டம்பர் 30, புதனன்று, தொமினிக்கன் தியான துறவற சபையின் அருள்சகோதரிகளை திருப்பீடத்தில் சந்தித்தபோது இவ்வாறு கூறிய  திருத்தந்தை, திருஅவையின் பணியில் தியான வாழ்வின் முக்கியத்துவத்தையும், குறிப்பாக அமைதியின் மதிப்பையும் எடுத்துரைத்தார்.

தொமினிக்கன் ஆன்மிக மரபில் செபம், படிப்பு, தவம் ஆகியவற்றின் முக்கியத்துவத்தை நினைவுகூர்ந்த திருத்தந்தை, நற்செய்திப் பணிக்கு ஆதரவாகத் தியான வாழ்வில் ஈடுபடுவோரின் பங்களிப்பையும் எடுத்துக்காட்டினார்.

புனித தாமஸ் அக்குவினாஸ் அவர்களை மேற்கோள்காட்டிய திருத்தந்தை, உண்மையான இறைவார்த்தைப் பணியானது அமைதி, செவிமடுத்தல், செபம் மற்றும் இறைவனுடனான ஆழமான உறவு ஆகியவற்றில் வேரூன்றியிருக்க வேண்டும் என்று வலியுறுத்தினார்.

அருள்சகோதரிகளின் ஒன்றுகூடல்கள் செபம், ஒருவரையொருவர் செவிமடுத்தல், அன்புடன் ஒருவரையொருவர் திருத்திக்கொள்ளுதல் மற்றும் நல்லிணக்கத்திற்கான வாய்ப்புகளாக அமைய வேண்டும் என்று ஊக்கமளித்த திருத்தந்தை, அமைதி என்பது உள்ளார்ந்த விருப்பத்துடன் மேற்கொள்ளப்படும் ஒரு செயலாகும் என்றும், அது உண்மையான உறவுகளை வளர்த்துக்கொள்ளவும், இறைவார்த்தைக்கு கவனத்துடன் செவிசாய்க்கவும் உதவுகிறது என்றும் தெரிவித்தார்.