செபமாலையின் வல்லமையும் அன்பின் வழியிலான உலக அமைதியும்!
ஜான்சிராணி அருளாந்து – வத்திக்கான்
மே 08, வெள்ளியன்று, பொம்பெயி நகருக்கு மேற்கொண்ட மேய்ப்புப்பணி பயணத்தின்போது அங்குள்ள செபமாலை அன்னை பேராலயத்தின் (Shrine of the Virgin of the Rosary of Pompei) முகப்பில் அமைந்துள்ள சதுக்கத்தில் (Piazza Bartolo Longo) திருத்தந்தை லியோ அவர்கள் திருப்பலி நிறைவேற்றினார். இலட்சக்கணக்கான நம்பிக்கையாளர்கள் பங்கேற்ற சிறப்புத் திருப்பலியில் திருத்தந்தை அவர்கள் ஆற்றிய மறையுரை.
அன்புள்ள சகோதர, சகோதரிகளே!
இன்று இந்தப் புனித பூமியில், அன்னை மரியாவின் நிழலில் நாம் அனைவரும் ஒன்றாகக் கூடியிருப்பது இறைவனின் பெரும் அருட்கொடை. 150 ஆண்டுகளுக்கு முன்பு, புனிதர் பார்டோலோ லோங்கோ இந்த இடத்தில் ஒரு சிறிய ஆலயத்தைக் கட்டத் தொடங்கியபோது, அது இன்று உலகெங்கிலும் உள்ள விசுவாசிகளுக்கு ஒரு கலங்கரை விளக்கமாக மாறும் என்று யாரும் நினைத்திருக்க மாட்டார்கள்.
இன்றைய நற்செய்தி வாசகம் நமக்கு அன்னை மரியாவின் புகழ்ப்பாடலை (Magnificat) நினைவூட்டுகிறது: ‘எனது ஆன்மா ஆண்டவரை ஏற்றிப் போற்றுகின்றது.’ இது வெறும் வார்த்தைகள் அல்ல; இது ஒரு வாழ்க்கை முறை. மரியா தனது வாழ்வை இறைவனுக்கு முழுமையாக அர்ப்பணித்ததால், இறைவனின் இரக்கம் அவர் வழியாக உலகிற்கு வந்தது.
ஓராண்டிற்கு முன்பு, பொம்பெயி நகரின் செபமாலை அன்னைக்கான ‘வேண்டுதல் செபம்’ (Supplication) நிகழ்ந்த இதே நாளில், பேதுருவின் வாரிசாக எனது திருத்தந்தை பணியைத் தொடங்கினேன். இதன் காரணமாகவே, எனது பணியை அன்னை மரியாவின் பாதுகாப்பின் கீழ் அர்ப்பணிப்பதற்காக இங்கு வர விரும்பினேன். திருத்தந்தை பதின்மூன்றாம் லியோ மற்றும் புனிதர் பார்டோலோ லோங்கோ ஆகியோரின் முன்மாதிரியைப் பின்பற்றி, புனித செபமாலை பக்தியை மீண்டும் ஒருமுறை ஊக்குவிக்க நான் விழைகிறேன்.”