இறை மக்கள் குடும்பமாக இல்லங்களில் அமர்ந்து செபிக்க வேண்டிய இன்றைய செபமாலைக் கருத்துக்கள்
மகிழ்ச்சி நிறை மறையுண்மைகள்.
1. தேவமாதாவுக்கு கபிரியல் அதிதூதர் காட்சி அளித்து மங்கள வார்த்தை சொன்னதைத் தியானித்து,
இன்று திருச்சபையானது தூய மார்த்தாவின் விழாவைக் கொண்டாடுகின்றது. தூய மார்த்தாவைப் போல நாமும் விருந்தோம்பலில் சிறந்து விளங்க வேண்டி இந்த முதல் 10 மணியை ஒப்புக் கொடுப்போம்.
2. தேவமாதா எலிசபெத்து அம்மாளை சந்தித்ததைத் தியானித்து,
இன்று புனித இலாசரின் நினைவினைக் கொண்டாடும் நாம் இலாசரைப் போல இயேசுவால் நாமும் மிகவும் அன்புசெய்யப்பட வேண்டி இந்த இரண்டாவது 10 மணியை ஒப்புக் கொடுப்போம்.
3. குழந்தை இயேசு பிறந்ததைத் தியானித்து
இன்றையத் திருப்பலி முதல் வாசகத்தில்
“ஒருவர் மற்றவரிடம் அன்பு செலுத்துவோமாக! ஏனெனில் அன்பு கடவுளிடமிருந்து வருகிறது. அன்பு செலுத்தும் அனைவரும் கடவுளிடமிருந்து பிறந்தவர்கள். அவர்கள் கடவுளை அறிந்துள்ளார்கள். அன்பில்லாதோர் கடவுளை அறிந்து கொள்ளவில்லை.! என கூறப்பட்டுள்ளது.
நாம் ஒருவர் மற்றவர் மீது தூய அன்பு செலுத்தி நாம் கடவுளிடமிருந்து பிறந்தவர்கள் என்பதை நிரூபிக்க இந்த மூன்றாவது 10 மணியை ஒப்புக் கொடுப்போம்.
4. குழந்தை இயேசுவை ஆலயத்தில் காணிக்கையாகக் கொடுத்ததைத் தியானித்து,
மணிப்பூர் மாநிலத்தில் அமைதி திரும்பிடவும் வளர்ந்துவரும் வெறுப்பின் விஷ செடிகள் அகற்றப்பட்டு அன்பின் விதைகள் விதைக்கப்பட வேண்டியும் இந்த நான்காவது 10 மணியை ஒப்புக் கொடுப்போம்.
5. காணமற் போன குழந்தை இயேசுவை ஆலயத்தில் கண்டு பிடித்ததைத் தியானித்து,
இந்த வாரம் முழுவதும் நம்மைக் காத்து வழி நடத்திய நம் தேவனுக்கு நன்றியாக இந்த ஐந்தாவது 10 மணியை ஒப்புக் கொடுப்போம்.
ஆமென்.