அக்டோபர் மாதம் 25ம் தேதி, அமைதிக்கான செபவழிபாட்டில் திருத்தந்தை
உரோம் நகரின் கொலோசெயம் அரங்கில் இம்மாதம் ( அக்டோபர்) 25ம் தேதி மாலை உலக மதத்தலைவர்கள் பங்குகொள்ளும் அமைதிக்கான செபவழிபாட்டில் திருத்தந்தை பிரான்சிஸ் அவர்களும் கலந்துகொள்வார் என திருப்பீட தகவல் தொடர்பகம் அறிவித்துள்ளது.
கத்தோலிக்க பிறரன்பு நிறுவனமான சான் எஜிதியோ அமைப்பு இம்மாதம் 23ம் தேதி முதல் 25ம் தேதி வரை உரோம் நகரில் ஏற்பாடு செய்துள்ள அமைதிக்கான அழுகுரல் என்ற கருத்தரங்கின் இறுதி நிகழ்வாக கொலோசெயத்தில் இடம்பெற உள்ள செப வழிபாட்டில் திருத்தந்தையும் கலந்து கொள்வார் என திருப்பீடச் செய்தி தொடர்பாளர் மத்தேயோ புரூனி அவர்கள் அக்டோபர் 11, இச்செவ்வாய்க்கிழமை தெரிவித்தார்.
அசிசியின் புனித பிரான்சிஸ் அவர்களின் உணர்வுடன் உலக மதங்களுடன் இணைந்த அமைதிக்கான கருத்தரங்கை இம்மாதம் 23ம் தேதி முதல் 25ம் தேதி வரை 3 நாள்களுக்கு உரோம் நகரின் La Nuvola கருத்தரங்கு மையத்தில் ஏற்பாடு செய்துள்ள சான் எஜிதியோ அமைப்பு, போர்களால் அழிவும் உயிரிழப்புகளும் இடம்பெறும் இன்றைய சூழலில், வருங்காலம் குறித்த நம்பிக்கையை அனைவருக்கும் வழங்கவேண்டிய கடமையை வலியுறுத்தி இதனை ஏற்பாடு செய்துள்ளது.
Comments are closed.