இறை மக்கள் குடும்பமாக இல்லங்களில் அமர்ந்து செபிக்க வேண்டிய இன்றைய செபமாலைக் கருத்துக்கள்
மகிழ்ச்சி நிறை மறையுண்மைகள்.
1. தேவமாதாவுக்கு கபிரியல் அதிதூதர் காட்சி அளித்து மங்கள வார்த்தை சொன்னதைத் தியானித்து,
இன்றைய திருப்பலி முதல் வாசகம் எடுக்கப்பட்ட திருத்தூதர் பணிகள் நூலில்,
“திருத்தூதர் தங்கள் கைகளை அவர்கள்மீது வைத்து இறைவனிடம் வேண்டினர். கடவுளது வார்த்தை மேன்மேலும் பரவி வந்தது. சீடர்களின் எண்ணிக்கை எருசலேம் நகரில் மிகுதியாகப் பெருகிக்கொண்டே சென்றது.” என வாசிக்கின்றோம்.
துவக்க காலத்தில் இறைவார்த்தை உலகம் முழுவதும் பரவ சீடர்கள் முக்கிய காரணமாக இருந்தனர். அத்தகையோரை இப்பணிக்கு தேர்ந்தெடுத்து அனுப்பிய இறைவனுக்கு நன்றியாக இந்த முதல் 10 மணியை ஒப்புக் கொடுப்போம்.
2. தேவமாதா எலிசபெத்து அம்மாளை சந்தித்ததைத் தியானித்து,
இன்றைய திருப்பலி நற்செய்தி வாசகத்தில்,
“இயேசு அவர்களிடம், “நான்தான், அஞ்சாதீர்கள்” என்றார்.” என வாசிக்கின்றோம்.
“ஆண்டவர் நம்மோடு இருப்பதால் எத்தீங்கிற்கும் அஞ்சத்தேவையில்லை.” (தி.பா. 23: 4). என்ற இறைவார்த்தையை உணர்ந்து அச்சத்தினை நாம் நம்மிடமிருந்து அகற்றிட இந்த இரண்டாவது 10 மணியை ஒப்புக் கொடுப்போம்.
3. குழந்தை இயேசு பிறந்ததைத் தியானித்து,
11-வது திருத்தந்தையும், இரண்டாம் நூற்றாண்டில் வாழ்ந்த இன்றைய புனிதருமான புனித அனிசேட்டஸை நம் திருச்சபைக்குத் தந்த நம் இறைவனுக்கு நன்றியாக இந்த மூன்றாவது 10 மணியை ஒப்புக் கொடுப்போம்.
4. குழந்தை இயேசுவை ஆலயத்தில் காணிக்கையாகக் கொடுத்ததைத் தியானித்து,
இந்தியாவிலும், பிற நாடுகளிலும் வேகமாகப் பரவிவரும் கொரோனா தொற்றின் இரண்டாவது அலை கட்டுக்குள் வரவேண்டி இந்த நான்காவது 10 மணியை ஒப்புக் கொடுப்போம்.
5. காணமற் போன குழந்தை இயேசுவைக் கண்டு பிடித்ததைத் தியானித்து,
பொது மக்களிடையே கொரோனா தொற்றுத் தடுப்பூசியை பற்றிய அச்சம் அகன்று அவற்றை எடுத்துக் கொள்ள வேண்டிய துணிவினை மக்களுக்கு இறைவன் அளித்திட வேண்டி இந்த ஐந்தாவது 10 மணியை ஒப்புக் கொடுப்போம்.
ஆமென்.