அமெரிக்கா மற்றும் இலத்தீன் அமெரிக்க நாடுகளின் திருஅவை அமைப்புகள், அரசுகள், நிறுவனங்கள், தொழிலாளர்கள், பல்கலைக்கழகங்கள், சமூக அமைப்புகள் ஆகியவை இணைந்து, மனிதநேயமான, நிலையான மற்றும் அனைவரையும் உள்ளடக்கிய எதிர்காலத்தை உருவாக்க வேண்டும் என்று திருத்தந்தை பதினான்காம் லியோ அவர்கள் அழைப்பு விடுத்துள்ளார்.
அமெரிக்கக் கண்டத்தில் சமூக, பொருளாதார மற்றும் சுற்றுச்சூழல் தொடர்பான வடக்கு-தெற்கு உரையாடலில் ஈடுபட்டுள்ள பல்வேறு துறைகளின் பிரதிநிதிகளை திருப்பீடத்தில் சந்தித்தபோது இவ்வாறு அழைப்பு விடுத்துள்ள திருத்தந்தை, இவ்வாறான சவால்களை எதிர்கொள்ள பகிரப்பட்ட பொறுப்பும் ஒத்துழைப்பும் அவசியம் என்று வலியுறுத்தினார்.
இன்றைய உலகில் அறிவியல் மற்றும் தொழில்நுட்ப வளர்ச்சியைப் பற்றி சிந்திக்கும்போது, புதிய தொழில்நுட்பங்களை ஏற்றுக்கொள்வதா அல்லது நிராகரிப்பதா என்பது மட்டுமே கேள்வியாக இருக்கக்கூடாது என்றும், “எத்தகைய மனிதநேயத்தை நாம் உருவாக்க விரும்புகிறோம்? அதில் ஒவ்வொரு மனிதருக்கும் என்ன இடம் இருக்கும்?” என்பதே முக்கியமான கேள்வியாக இருக்க வேண்டும் என்றும் திருத்தந்தை குறிப்பிட்டார்.
திருஅவையின் சமூகக் கோட்பாடு வெறும் விதிமுறைகளின் தொகுப்பு அல்ல; அது பகிரப்பட்ட தேர்ந்து தெளிதல் செயல்முறை என்று குறிப்பிட்ட திருத்தந்தை, எடுக்கப்படும் முடிவுகள் மனித மாண்பைப் பாதுகாத்து, பொதுநலனை மேம்படுத்துகின்றனவா என்பதன் அடிப்படையில் மதிப்பிடப்பட வேண்டும் என்று வலியுறுத்தினார்.
மேலும், விவிலியத்தில் இடிந்த எருசலேமை மீண்டும் கட்டியெழுப்பிய நெகேமியாவை எடுத்துக்காட்டாகக் குறிப்பிட்ட திருத்தந்தை, வரலாற்றின் கட்டுமானப் பணிகளில் அனைவரும் தங்களுக்குரிய பங்களிப்பைச் செய்ய வேண்டும் என்று அழைப்பு விடுத்தார்.
வேறுபாடுகளைக் கடந்து பொதுநலனை நாடுவதற்கான “பேச்சுவார்த்தை கலாச்சாரத்தை” வளர்த்துக்கொள்ளுமாறும், அதன் மூலம் உலகிற்குத் தேவையான அமைதிக்கான தூதாண்மைக்கு பங்களிக்குமாறும் திருத்தந்தை கேட்டுக்கொண்டார்.
இறுதியாக நமது காலத்தின் முன்னேற்றம் புதிய அழிவுகளை உருவாக்காமல், குறிப்பாக மிகவும் தேவையில் இருப்பவர்களுக்கு பாதுகாப்பான இல்லமாகவும் அடைக்கலமாகவும் அமைய வேண்டும் என்று வலியுறுத்தி திருத்தந்தை தனது திருத்தூது ஆசீரை வழங்கி உரையை நிறைவு செய்தார்.
