இறை மக்கள் குடும்பமாக இல்லங்களில் அமர்ந்து செபிக்க வேண்டிய இன்றைய செபமாலைக் கருத்துக்கள்.
01.12.2023
ஒளி நிறை மறையுண்மைகள்.
1. இயேசு யோர்தான் ஆற்றங்கரையில் திருமுழுக்குப் பெற்றதைத் தியானித்து,
“நற்செய்தி அறிவிப்போரின் பாதங்கள் எத்துணை அழகாய் இருக்கின்றன”. என புனித பவுல் இன்றைய திருப்பலி முதல் வாசகத்தில் கூறுகிறார்.
இறைவனுக்காக, இறைப் பணிக்காக தங்களது குடும்பம், ஊர், நாடு விட்டு வேறொரு இடத்தில் தற்போது மறைபரப்புப் பணியில் ஈடுபட்டுக் கொண்டிருக்கும் எண்ணற்ற நமது அருட் தந்தையர்கள், அருட் கன்னியர்கள் மற்றும் அருட்சகோதரர்களின் ஆன்ம, சரீர நலன்களுக்காக இந்த முதல் 10 மணியை ஒப்புக் கொடுப்போம்.
2. இயேசு கானாவூர் திருமணத்தில் தண்ணீரைத் திராட்சை இரசமாக மாற்றியதைத் தியானித்து,
“வாயார அறிக்கையிடுவோர் மீட்புப் பெறுவர். ஏனெனில், “அவர்மீது நம்பிக்கை கொண்டோர் வெட்கத்திற்கு உள்ளாக மாட்டார்” என்பது மறைநூல் கூற்று.” என புனித பவுல் இன்றைய முதல் வாசகத்தில் கூறுகிறார்.
மிகச் சிறிய அளவில் இருந்தாலும் கூட, நமக்கு இயன்ற வகையில், நமது பல பணிகள் மத்தியிலும் நற்செய்தியை மற்றவருக்கு பரப்புவோம். அறிக்கையிடுவோம். இவ்வாறு அறிக்கையிட்ட ஒவ்வொருவரையும் இதுநாள் வரையிலும் வெட்கமுற விடாத இறைவனுக்கு நன்றியாக இந்த இரண்டாவது 10 மணியை ஒப்புக் கொடுப்போம்.
3. இயேசு இறையாட்சி அறிவித்ததைத் தியானித்து,
““என் பின்னே வாருங்கள்; நான் உங்களை மனிதரைப் பிடிப்பவர் ஆக்குவேன்” என நமதாண்டவர் இயேசு இன்றைய நற்செய்தியில் கூறுகிறார்.
இந்த அழைப்பு சீடர்களுக்கு மட்டும் அல்ல மாறாக திருமுழுக்கு பெற்ற ஒவ்வொரு கிறித்துவர்களுக்கும் விடப்பட்ட அழைப்பு என்பதை உணர்ந்து ஆன்மாக்களை இறைவன்பால் கொண்டு சேர்க்கும் பணியை முழு உள்ளத்தோடு செய்ய வேண்டி இந்த மூன்றாவது 10 மணியை ஒப்புக் கொடுப்போம்.
4. இயேசு தாபோர் மலையில் உருமாற்றம் அடைந்ததைத் தியானித்து,
“ஓ, மாட்சிமை மிகுந்த சிலுவையே, உனக்காகத் தான் நான் இத்தனை நாள்கள் ஏங்கிக்கொண்டிருந்தேன்” எனக் கூறி ‘X’ வடிவ சிலுவைச்சாவை துணிவுடன் ஏற்று இறைவனுக்காக. வீர மறைசாட்சியாக மரித்த திருத்தூதர் அந்திரேயாவின் வீரத்துணிவை தூய ஆவியானவர் நமக்கு தந்திட வேண்டி இந்த நான்காவது 10 மணியை ஒப்புக் கொடுப்போம்.
5. இயேசு இராவுணவின் போது நற்கருணையை ஏற்படுத்தியதைத் தியானித்து,
தங்கள் குடும்பத்தினரால் மறக்கப்பட்டு பல ஆண்டுகளாக, வேண்டுதல்களுக்காக ஏங்கிக் கொண்டிருக்கும் அனைத்து உத்தரிய ஸ்தலத்தில் இருக்கும் ஆன்மாக்களும் இறைவனின் மோட்ச பாக்கியத்தை விரைவில் அடைய வேண்டி இந்த ஐந்தாவது 10 மணியை ஒப்புக் கொடுப்போம்.
ஆமென்.