மார்ச் 29 : நற்செய்தி வாசகம்

மரியாவைத் தடுக்காதீர்கள். என் அடக்க நாளை முன்னிட்டு அவர் இதைச் செய்யட்டும்.
✠ யோவான் எழுதிய நற்செய்தியிலிருந்து வாசகம் 12: 1-11
பாஸ்கா விழாவுக்கு ஆறு நாளுக்கு முன்பு இயேசு பெத்தானியாவுக்குச் சென்றார். அங்குதான் இயேசு இலாசரை உயிர்த்தெழச் செய்தார். அங்கு அவருக்கு விருந்து அளிக்கப்பட்டது. மார்த்தா உணவு பரிமாறினார். இயேசுவோடு பந்தியில் அமர்ந்திருந்தவர்களுடன் இலாசரும் இருந்தார். மரியா இலாமிச்சை என்னும் கலப்பற்ற விலையுயர்ந்த நறுமணத் தைலம் ஏறக்குறைய முந்நூற்று இருபது கிராம் கொண்டுவந்து இயேசுவின் காலடிகளில் பூசி, அதனைத் தமது கூந்தலால் துடைத்தார். தைலத்தின் நறுமணம் வீடெங்கும் கமழ்ந்தது.
இயேசுவின் சீடருள் ஒருவனும் அவரைக் காட்டிக்கொடுக்க இருந்தவனுமான யூதாசு இஸ்காரியோத்து, “இந்தத் தைலத்தை முந்நூறு தெனாரியத்துக்கு விற்று, அப்பணத்தை ஏழைகளுக்குக் கொடுத்திருக்கக் கூடாதா?” என்று கேட்டான். ஏழைகள்பால் கொண்டிருந்த அக்கறையினால் அல்ல, மாறாக அவன் ஒரு திருடனாய் இருந்ததால்தான் இப்படிக் கேட்டான். பணப்பை அவனிடம் இருந்தது. அதில் போடப்பட்ட பணத்திலிருந்து அவன் எடுத்துக்கொள்வதுண்டு. அப்போது இயேசு, “மரியாவைத் தடுக்காதீர்கள். என் அடக்க நாளை முன்னிட்டு அவர் இதைச் செய்யட்டும். ஏழைகள் உங்களோடு என்றும் இருக்கிறார்கள். ஆனால் நான் உங்களோடு என்றும் இருக்கப்போவதில்லை” என்றார்.
இயேசு அங்கு இருப்பதை அறிந்த யூதர்கள் பெருந்திரளாய் வந்தார்கள். அவர்கள் இயேசுவை முன்னிட்டு மட்டும் அல்ல, அவர் உயிர்த்தெழச்செய்திருந்த இலாசரைக் காண்பதற்காகவும் வந்தார்கள். ஆதலால் தலைமைக் குருக்கள் இலாசரையும் கொன்றுவிடத் திட்டமிட்டார்கள். ஏனெனில் இலாசரின் காரணமாக யூதர்களிடமிருந்து பலர் விலகி இயேசுவிடம் நம்பிக்கை கொண்டனர்.
ஆண்டவரின் அருள்வாக்கு.
—————————————————-
I எசாயா 42: 1-7
II யோவான் 12: 1-11
“அவர் மக்களினங்களுக்கு நீதி வழங்குவார்”
நீதி வழங்கிய ஆண்ட்ரு கர்னகி:
அமெரிக்க ஐக்கியநாடுகளைச் சார்ந்த மிகப்பெரிய தொழிலதிபர் ஆண்ட்ரூ கார்னகி (Andrew Carnegie 1835-1919). ஒருநாள் இவரது அலுவலகத்திற்குச் சமூகவியலார் (Socialist) ஒருவர் வந்தார். அவர் இவரிடம், “பலரும் வறுமையில் வாட, நீங்கள் தேவைக்கு மிகுதியாகச் சொத்துச் சேர்த்து வைத்திருப்பது அநீதியல்லவா?” என்றார். உடனே இவர் அவரிடம், “இப்பொழுது உலக மக்கள்தொகை எவ்வளவு என்று உங்களுக்குத் தெரியுமா?” என்று கேட்க, அவரும் அதைச்சொல்ல, இவர் ஒரு காகிதத்தையும் பேனாவையும் எடுத்து, தன்னுடைய சொத்தை, உலக மக்கள்தொகையால் வகுத்தார். அப்பொழுது ஒவ்வொருவருக்கும் பதினாறு சென்ட் பணம் இவர் தருவதாக வந்தது. பின்னர் இவர் தன்னிடமிருந்த பதினாறு சென்ட் பணத்தை எடுத்து, அந்தச் சமூகவியலாரிடம் கொடுத்து, ‘இதோ! உங்களுக்குரிய தொகை. இதைப் பெற்றுக்கொள்ளுங்கள். நான் உங்களுக்கு நீதி வழங்கிவிட்டேன்” என்றார்.
ஆம், ஆண்ட்ரூ கர்னகி தன்னிடம் வந்த சமூகவியாலருக்குரிய தொகையைக் கொடுத்து, அவருக்குக் நீதிவழங்கினார். இன்றைய முதல்வாசகத்தில், துன்புறும் ஊழியனாம் இயேசு மக்களுக்கு நீதி வழங்குவார் என்று சொல்லப்படுகின்றது. அதைக்குறித்து நாம் சிந்திப்போம்.
திருவிவிலியப் பின்னணி:
இறைவாக்கினர் எசாயா நூலிலிருந்து எடுக்கப்பட்ட இன்றைய முதல்வாசகமானது, துன்புறும் ஊழியனைப் பற்றிய நான்கு பாடல்களில் முதல்பாடலாகும். மற்றவை கீழ்க்காணும் பகுதிகளில் இடம்பெறுகின்றன (எசா 49: 1-6; 50: 1-11; 52: 13-53: 12). துன்புறும் ஊழியன் மக்களினங்களுக்கு நீதி வழங்குவார் என்று கூறும் ஆண்டவர், “நெரிந்த நாணலை முறியார்; மங்கி எரியும் திரியை அனையார்” என்கின்றார். நெரிந்த நாணலும், மங்கி எரியும் திரியும் வலுவற்றவை. துன்புறும் ஊழியன் அவற்றை எதுவும் செய்யப்போவதில்லை என்று ஆண்டவர் கூறுவதன்மூலம், துன்புறும் ஊழியன் வறியவர்கள் மட்டில் மிகுந்த இரக்கத்தோடும் அன்போடும் இருப்பார் என்ற செய்தியைச் சொல்கின்றார். இதற்கு அர்த்தம் தருவதாய் இருக்கின்றது இன்றைய நற்செய்திவாசகம்.
நற்செய்தியில் இலாசரின் சகோதரி மரியா இயேசுவின் காலடிகளில் நறுமணத் தைலத்தைப் பூசுவதைப் பார்த்த யூதாசு இஸ்காரியோத்து, தைலத்தை விற்று அப்பணத்தை ஏழைகளுக்குக் கொடுக்கலாமே என்று சொன்னபோது, இயேசு அவரிடம், “மரியாவைத் தடுக்காதீர்கள்….” என்கின்றார். மரியா ஒரு பெண் என்பதாலும், தனக்குப் பணத்தின்மீது மிகுந்த ஆசை இருந்தது என்பதாலும் யூதாஸ் அவரைத் தடுக்கமுற்பட்டபோது, இயேசு மரியாவின் சார்பாக இருக்கின்றார். இவ்வாறு இயேசு எளியவர்மட்டில் இரக்கம்கொண்டு நீதியை நிலைநாட்டுகின்றார். இயேசு நீதியை நிலைநாட்டியதுபோல் நாம் நீதியை நிலைநாட்டுகின்றோமா?
சிந்தனைக்கு:
 கடவுள் ஏழைகளுக்கு வழங்கும் நீதி அநீதி அல்ல, சமநீதி.
 நீதியை நிலைநாட்டு வேட்கை கொண்டோர்… நிறைவு பெறுவர் (மத் 5: 6)
 நீதியை நிலைநாட்டினால், ஆண்டவர் இரக்கம் காட்டுவார் (ஆமோ 5: 15)
இறைவாக்கு:
‘நீதியை விதைப்போரோ உண்மையான ஊதியம் பெறுவர்’ (நீமொ 11: 18) என்கிறது நீதிமொழிகள் நூல். ஆகையால், நாம் இயேசுவின் வழியில் நடந்து, நீதியை நிலைநாட்டி, இறையருளை நிறைவாகப் பெறுவோம்.

Comments are closed.