ஆப்பிரிக்க நாடுகளுக்கான திருத்தந்தையின் பயணத் திட்டங்கள்

0

வரும் ஏப்ரல் 13 முதல் 23 வரை இடம்பெறவுள்ள, திருத்தந்தை பதினான்காம் லியோ அவர்களின் நான்கு ஆப்பிரிக்க நாடுகளுக்கான திருத்தூதுப் பயணத்திற்கான அதிகாரப்பூர்வ நிகழ்ச்சி நிரலை வெளியிட்டுள்ளது திருப்பீடச் செய்தித் தொடர்பகம்

திருத்தந்தை லியோ அவர்கள், தான் திருத்தந்தையாகப் பொறுப்பேற்றப் பிறகு மேற்கொள்ளும் மூன்றாவது அனைத்துலகத் திருத்தூதுப் பயணமான இந்த 11 நாள் பயணத்தில், அல்ஜீரியா, கேமரூன், அங்கோலா மற்றும் ஈக்வடோரியல் கினியா ஆகிய நான்கு நாடுகளுக்குச் செல்வார் என்றும், இப்பயணத்தில் அவர் 11 நகரங்களை உள்ளடக்கி, ஏராளமான பொது உரைகள், திருப்பலிகள் மற்றும் கூட்டங்களில் பங்கேற்பார் என்றும் அதன் அறிக்கையில் தெரிவிக்கப்பட்டுள்ளது.

அல்ஜியர்ஸில் தனது திருத்தூதுப் பயணத்தைத் தொடங்கும் திருத்தந்தை, அங்கு அதிபர் அப்தெல்மஜித் தெபூனைச் சந்திப்பதுடன், முக்கிய மத மற்றும் வரலாற்றுத் தலங்களையும் பார்வையிடுவார் என்றும் அவ்வறிக்கை உரைக்கிறது.

மேலும் அங்கு அமைதிக்கான முன்னெடுப்புகள், இளைஞர் ஈடுபாடு மற்றும் நலவாழ்வுப் பாதுகாப்பு ஆகியவற்றில் கவனம் செலுத்தும் வகையில், யவுண்டே, பமெண்டா மற்றும் டூவாலா ஆகிய இடங்களில் தங்கி, கேமரூனுக்குப் பயணம் மேற்கொள்வார்.

அடுத்து அங்கோலாவிற்குப் பயணம் மேற்கொள்ளும் திருத்தந்தை லியோ அவர்கள், அதிபர் ஜோவோ லோரென்சோவைச் சந்திப்பார் என்றும், கிலாம்பாவில் திருப்பலி நிறைவேற்றி முக்சிமாவில் உள்ள புனித மரியன்னை திருத்தலத்தைப் பார்வையிடுவார் என்றும் கூறியுள்ளது அதன் அறிக்கை.

ஈக்வடோரியல் கினியாவில் இடம்பெறும் இறுதிக்கட்டப் பயணத்தில், அதிபர் தியோடோரோ ஒபியாங் நுகேமா மபாசோகோவுடனான சந்திப்புகள், மருத்துவமனைகள் மற்றும் சிறைச்சாலைகளுக்கான வருகைகள், மேலும் இளைஞர்கள் மற்றும் குடும்பத்தினருடனான நிகழ்வுகள் ஆகியவை அடங்கும் என்றும் குறிப்பிட்டுள்ளது திருப்பீடச் செய்தித் தொடர்பகம்.

திருத்தந்தை பதினான்காம் லியோ அவர்கள் தனது திருத்தூதுப் பயணத்தை முடித்துக்கொண்டு உரோமைத் திரும்புவதற்கு முன்பு, ஏப்ரல் 23, வியாழக்கிழமையன்று, மலாபோவில் நிகழ்வுறும் திருப்பலியுடன் அவரின் இந்தப் பயணம் நிறைவடையும் என்றும் சுட்டிக்காட்டியுள்ளது திருப்பீடச் செய்தித் தொடர்பகம்

இந்த செய்தியை வாசித்ததற்கு நன்றி. நீங்கள் தொடர்ந்து எங்களது அண்மைச் செய்திகளைப் பெற விரும்பினால் “செய்தி மடல்” என்பதைத் தொட்டு பதிவுசெய்ய உங்களை அழைக்கின்றோம். இங்கே கிளிக் செய்யவும்

Leave A Reply

Your email address will not be published.