மறையுரைச் சிந்தனை (நவம்பர் 08)
காணாமல் போனதை தேடிச் செல்லும் இயேசு
மலையடிவாரத்தில் இந்த அந்த குருகுலமே அன்றைக்கும் மிகவும் பரபரப்பானது. சீடர்கள் அனைவரும் கோபத்தில் கொந்தளித்துக் கொண்டிருந்தனர். இருக்காதா பின்னே? இத்தனை ஆண்டுகளாக தங்களுக்கு நற்போதனைகளை மட்டுமே கற்பித்து வந்த குருவை, திருட்டுப் பட்டம் சுமத்தி சிறையில் அடைத்துவிட்டார்கள் என்று அறிந்தால் எந்த சீடன்தான் பொறுத்துக் கொண்டு இருப்பான்?. குரு, அரசாங்க வீரர்களால் கைது செய்யப்பட்டு, அரசனின் முன்பாக நிறுத்தப்பட்டு சிறையில் அடைக்கப்பட்டிருந்தார். சீடர்கள் அனைவரும் அரண்மனைக்குச் சென்று தங்கள் குருவை விடுவிக்க வேண்டும் என்று கேட்டனர். ஆனால் அங்கு விசாரித்ததில், குருவே தான்தான் இந்த குற்றத்தை செய்தேன் என்று ஒப்புக்கொண்டு விட்டதாகவும், அதனால்தான் சிறையில் அடைத்ததாகவும் பதில் அளிக்கப்பட்டது.
சீடர்கள் அனைவரும் அதிர்ச்சியில் உறைந்து போயினர். அவர்களால் மேற்கொண்டு எதுவும் செய்ய முடியவில்லை. ஆறு மாதம் கழிந்தது. சிறையில் இருந்து வெளியே வந்த குரு, அடுத்த சில நாட்களிலேயே வேறு ஒரு குற்றத்திற்காக மீண்டும் சிறை சென்றார். இப்படி சின்னச் சின்ன குற்றங்களைச் செய்வதும், அதன் காரணமாக அடிக்கடி சிறைச்சாலைக்கு செல்வதுமாக இருந்தார். இதனால் அவரை மக்கள் அனைவரும் ‘சிறைச்சாலை குரு’ என்றே அழைக்கத் தொடங்கினர்.
குருவால், அவரது சீடர்கள் மனம் நொந்து போனார்கள். ஒரு முறை சிறையில் இருந்து வெளியே வந்த குருவிடம், “குருவே! உங்களுக்கு என்ன வேண்டும்? சொல்லுங்கள். எதுவாக இருந்தாலும் கொண்டு வந்து உங்களின் காலடியில் குவிக்கிறோம். எதற்காக இப்படித் திருடுகிறீர்கள்? அதுவும் போர்வை, குடை, பாதுகை என்று… வேண்டாம். உங்களுக்கு என்ன வேண்டுமானாலும் நாங்கள் கொண்டு வந்து தருகிறோம்” என்றனர். ஆனால் சீடர்கள் இந்தக் கேள்வியை முன் வைக்கும் போதெல்லாம், குருவானவர் புன்னகைத்தபடியே அங்கிருந்து அகன்று விடுவார்.
காலங்கள் கடந்தன. குருவுக்கு இப்போது மிகவும் வயதாகிவிட்டது. உடல் தளர்ந்து படுத்த படுக்கையாகிவிட்டார். ஒருநாள் அவரைச் சுற்றியிருந்த சீடர்கள், “இப்போதாவது சொல்லுங்கள். எதற்காக அடிக்கடி திருடிவிட்டு சிறைக்குச் சென்றீர்கள்?” என்றனர். “நீங்கள் அனைவரும் நாகரிக உலகில் வாழ்பவர்கள். உங்களுக்கு வழிகாட்ட என்னைப் போல் ஏராளமான குரு கிடைப்பார்கள். ஆனால் சிறையில் இருப்பவர்களுக்கு, உபதேசம் பெறுவதற்கோ, நல்வழி காட்டுவதற்கோ யாரும் இல்லை. அதனால்தான் அடிக்கடி சிறை சென்றேன். இப்போது அங்கு போய் பாருங்கள். பலரும் திருந்தி நல்வழிக்குத் திரும்பிவிட்டனர்” என்றார் குரு.
சிறைச்சாலையில் இருக்கக்கூடிய கைதிகளை மனம்திருப்புவதற்காக திருடர் பட்டத்தைச் சுமந்து வரும் தங்கள் குருவை நினைத்து பெருமைப் பட்ட சீடர்கள், ‘இப்படியும் ஒரு குருவா?’ என நினைத்து கண்ணீர் சொரிந்தார்கள்.
நற்செய்தி வாசகத்தில் ஆண்டவர் இயேசு, தன்னை காணாமல் போனதை அல்லது இழந்து போனதைத் தேடி செல்லும் நல்ல ஆயன் என்று எடுத்துரைக்கின்றார். இறைவனைப் பொறுத்தளவில் எல்லாரும் மீட்படைய வேண்டும், யாரும் அழிந்துபோகக்கூடாது. அதற்காக அவர் ‘99 நேர்மையாளர்களை’ விட்டுவிட்டு வழிதவறிப் போன அல்லது காணாமல் போன ஒரு பாவியைத் தேடிச் செல்கின்றார். அவ்வாறு அவர் தேடிச் சென்று, கண்டடைக்கின்றபோது மிகுந்த மகிழ்ச்சி அடைகின்றார்.
இங்கே ஒரு கேள்வி எழலாம். ‘ஒரே ஒரு பாவிக்காக கடவுள் தொண்ணுற்று ஒன்பது நேர்மையாளர்களையும் விட்டுவிட்டுப் போவது நல்லதா?’ என்பதுதான் அந்தக் கேள்வி. கடவுளைப் பொறுத்தளவில் ஒவ்வொருவரும் முக்கியம், இவர்தான் முக்கியம், அவர் தேவையல்ல என்பது கிடையாது. எல்லாரும் முக்கியம். அதனால்தான் வழிதவறிப் போன ஒரே ஒரு ஆட்டை/ பாவியைத் தேடிச் செல்கின்றார். அப்படியானால் 99 நேர்மையாளர்களின் கதி என்ன? என்று கேட்கலாம். இந்த உலகத்தில் கடவுளைத் தவிர வேறு யார் நல்லவராக இருக்க முடியும்? எல்லாரும் ஒருவிதத்தில் பாவிகள்தான், எல்லாரும் ஒரு விதத்தில் குற்றம் இழைத்தார்கள். ஆனால் என்ன, அவர்கள் மனம்மாறுவது கிடையாது. அவர்கள் மனமாறத் தயாராக இருந்தால், அவர்களும் கடவுளின் அன்பிற்குப் பாத்திரமாவார்கள் என்பது உறுதி.
ஆகவே, பாவத்தால் கடவுளை விட்டு தொலைவில் இருக்கின்ற நாம், அவருடைய அன்பை உணர்ந்தவர்களாய், அவர் நம்மைத் தேடிவருவதை உணர்ந்து, அவருடைய கைகளில் சரணாகதி அடைவோம். மனம்மாறி அவருக்கு உகந்த மக்களாவோம். அதன்வழியாக இறையருள் நிறைவாய் பெறுவோம்.
Comments are closed.